جرثومة المعدة وكيفية الوقاية منها
مبدئيا كده إي هي جرثومة المعدة ؟
هي عبارة عن بكتريا تدخل الجسم عن طريق الأكل والشرب وتفضل عايشة جوه القناة الهضمية بتاعتك وبيسموها الميكروب الحلزوني أو جرثومة المعدة ( H.pylori ) .
طيب هي منتشرة بين الناس ولا محدودة في ناس معينة ؟
منتشرة جدا بينا كلنا.. تخيل مثلا لو عددنا ٩٠ مليون في ٦٠ مليون معرضين للإصابة بيها (حوالي تلتين السكان).
طيب هل هتعمل قرحة مع كل الناس ؟
لا غالبا مش بتعمل مشاكل مع كل الناس لكن الناس اللي عندهم مشكلة في المعدة زي التهاب هتعملهم قرحة .
طيب بتدخل الجسم ازاى ؟
بتدخل مع الأكل والشرب .
اي أكل كده؟!
لا طبعا الأكل اللي مش نظيف او اللي مش مطبوخ كويس يعنى ني شوية وعشان كده بتيجي لمعظم الناس اللي بياكلوا من المطاعم خصوصاً لو مطعم مش نظيف أو الأكل مش مطبوخ كويس .
المشروبات طبعاً اللي مش نظيف .
طيب الجرثومة وصلت للمعدة خلاص ها وبعدين هتعمل ايه ؟
ممكن تفضل سنين في جسمك بدون مشاكل وطوال الفترة دي واحدة واحدة تبدأ تهاجم بطانة المعدة والأمعاء وتعمل تآكل فيها زي جرح كده فلما المعدة بتاعتك تفرز حمض ال HCL اللي بيهضم الأكل يقوم يروح على المناطق المجروحة دي ويعمل قرحة معدة .
طيب لو انا عندي قرحة نتيجة جرثومة معدة هحس بأيه يا دكتور ؟
تلاقى عندك ألم في بطنك لما معدتك تكون فاضية وجعان ولما تأكل الألم يخف شوية ويرجع يجي تانى بين الوجبات .
دايما عندك انتفاخات وغازات .
دايما عندك تجشؤ .
هتحس بغثيان وممكن ارتجاع .
وزنك هيقل فجأة بدون سبب
طب ايه العلامات الخطيرة اللي اخاف منها ؟
لو فى دم سواء دم فالبراز احمر او البراز لونه اسود.
او لو رجعت دم .
او لو الالم على طول مش بيروح او حاسس بتعب شديد وتوهان
طيب إزاى اتأكد ان عندي جرثومة المعدة ؟
بالتحاليل اعمل تحليل جرثومة المعدة H.pylori ) ) سواء في الدم او البراز .
او الطريقة التانية بالمنظار .
طلعت موجوده عندي ايه العلاج ؟
في حالة وجودها لازم تروح للطبيب عشان يحدد لك جرعة العلاج المناسبة .
طب خدت العلاج وتمام عايز اعرف بقا هي راحت ولا لاء ؟ وامتي اعيد التحليل ؟
بعد شهر من العلاج .
طيب هل في ادوية بتأثر على نتيجة التحليل ؟
ايوه المضاد الحيوي لو بتاخده وروحت عملت تحليل هيأثر علي النتيجة بشكل كبير
عشان كده قبل ما تروح لازم توقف المضاد الحيوية اسبوعين على الاقل قبل التحليل .
طيب انا خدت العلاج وخفيت الحمد لله اعمل ايه عشان أحمي نفسي واولادي منها ؟
النظافة ثم النظافة ثم النظافة .
لما تدخل الحمام اغسل ايدك كويس وانت خارج.
قبل ما تاكل اغسل ايدك كويس .
الاكل يستوى كويس بلاش أكل ني وبلاش اكل مطاعم
بلاش تشربوا من مية الحنفية او اشترى فلتر فى بيتك ينقى المياه .
بلاش عصبية او ضغط عصبي او تدخين او خمرة .
طب ايه الاكل اللي يأكله مريض جرثومة المعدة ؟
الصبح حليب بالعسل او مياه بالعسل على الريق .
وجبتك يكون فيها خضروات وفواكه وحبوب كاملة.
بالليل عشاء خفيف فيه علبة زبادى .
بلاش تاكل كتير مرة واحدة وكل وجبات صغيرة اكتر من مرة .
بلاش فواكه حمضية زى الليمون واليوسفى والبرتقال .
بلاش مقليات بزيادة او اكل مسبك بزيادة ومليان دهون .
بلاش بهارات او حراق بزيادة .
بلاش شاي او قهوة خصوصا علي معدة فاضي
Comments are closed.