بيدخل كلية الهندسة حتي لو بالفلوس ، بيغير حياته 180 درجه ويحط حروف الـ Eng جمب اسم الأكونت وأبوه يجيب ميكروفون ويقول المهندس راح المهندس جه وما ينفعش تنده باسمه او تقوله استاذ كذا لا لازم تقولو يا بشمهندس، بس هما احرار !
_بتدخل كلية الطب, بتخسر كل أصحابك اللي دخلوا كليات متوسطه حتى لو تعرفهم من ابتدائي وتبدأ تتعرف على ناس يكونوا من نفس مستواها, بس هو حر!
_بمجرد دخوله الكلية الحربية أو كلية الشرطة, مناخيره بتترفع لفوق تلقائيا, ومش هو لوحده ده عيلته كلها بتغير اساميها, وأي حد ليه علاقه بيه بيغير اسمه, صاحب الظابط, ابن عم الظابط, حبيبة الظابط, اخت الظابط, حظااااااابط…!
_طالب تجاره انجلش انت ممكن تقوله انت عندك عقم ما بتخلفش وممكن يتقبل الموضوع ولا انك تقارنه بطالب تجاره عربي نهائي, هتلاقى قنبلة شتايم خرجت في وشك ليه يابن الناس تقارنه بواحد بيدفع 750 جنيه فى السنه وهو بيدفع 10000 لمجرد أن الـ بيدرسه بالانجلش هناك بيدرسه بالعربي, بس لا انت عايز تقارني بواحد الفرق بيني وبينه 40 الف جنيه! ما يجبوش تمن عربيه 128…
بلد 90% من اهلها ماشين بمبدأ بنتنا ما تتجوزش الا مهندس أو دكتور, المهندس للمهندسة والدكتور للدكتورة والدكتورة ما تاخدش اقل من مهندس أو دكتور أو ظابط شرطة, وفى عائلات ما بياخدوش غير ظباط جيش, اه والله, وفى عائلات ما بتدخلش حد بينها الا إذا كان مهندس عشان يبقا اسمهم عيلة المهندسيـن وماحدش يضيع شرف العيلة!
الـ معاه ايفون بيشوف نفسه على الـ معاه سامسونج, الـ بيجيب بنطلون جامد بيتصور بيه 100 صورة ولمده شهر يفضل يتصل بصحابه :- أي يا زميلي مش انا جبت بنطلون من زارااااا اه والله زى ما بقولك تعالا يلا نخربها فى وسط البلد!
_بتجيب قلم روج من ماك ولا كوتش من Nike ويجي عليه شوية تراب ما تشوفهمش الا بالعين المجردة فاتروح تكتب ع الفيس يا ريت الناس الـ مركزة فى حياتي تكون مبسوطة دلوقتى!
_أول ما بيخطب بيبدأ يعتزل صحابه ويختفى عنهم و لو قعد معاهم مرة يحسسهم انه العاقل الوحيد والناضج الأوحد
_أول ما بتتخطب تفضل تتكلم بأديها كتير
وكل ما تكلم صحباتها تقلهم خطيبي راح خطيبي جه
وكأنها مخطوبة لـ ظافر عابدين
_انتوا من اول ما بتصحوا لحد ما بتناموا بتفطروا وتتغدوا وتتعشوا عنصرية, انتوا اكتر شعب بيعشق الماديات وبيعشق ان يكون ليه نفوذ وسلطة, ال معاه عربية – كاميرا – ايفون أكتر واحد هتلاقيه مسستم حياته على عدد ناس معينه الـ هو انا وصلت لطبقة الناس الـ معاها عربيات يبقى اعرف ناس معاها عربيات ما ينفعش انزل اقل من كدا , لو جتلك الفرصة ال تشهر بيها عنصريتك بتشهرها علي حساب غيرك من غير ما تاخد بالك
_بلاش النقص ال عندنا يغيرنا للأسوء، ويخلينا مكروهين في وسط الناس ، بلاش تتكبر علي حد لمجرد إن ربنا كرمك بحاجة مش مع غيرك ، عشان ممكن في يوم زي ما ربنا إدهالك ، ياخدها منك ويخسفك لسابع أرض…!
_صدقني حُب الناس عمره ما كان بفلوس ولا بجاه ولا بـ عز ، حُب الناس برضي ربنا ، وإخلاقك ، ودعوات أمك وأبوك ، غير كدا كله تراب!
_دا الشبع في العين مش في البطن، والغنى في النفس مش في الجيب، والحلو في الروح مش في الشكل
